Bärebrüedsche
Zwöi Brüedsche, zwöi Mikrofon u eis Ziel: D Welt mit üsem Humor zumne bessere Ort mache. Viel Spass bim zuelose! Instagram: @baerebruedsche
Alle Folgen
Bärebrüedsche - Folg 32 - Achtung Zürcher
D Bärebrüedsche di werbefrei, Influencer befreit u Bullshit haltig Podcast isch wieder zrugg mit nöiem Material. Hesch du Chruseli oder gradi Haar? Weisch du wieso z Meer salzig isch? D Bärebrüedsche kläre uf, was du no nid weisch. Mir spiele Gitarre, lache üs eine ab u bashe aus gäbs kes morn me. Mir erkläre de Quotemänner offiziell dr Chrieg u Oli vrzeut, wie er neuerdings e Handynummere hätt chönne ergattere für 11 Franke. Tönt ds spannend gnueg, dasd drilosisch? Ps. Passet uf we dr ines Chinderbecki im Hallebad göht!
...mehr-
Bärebrüedsche - Folg 31 - E Löu und e blöde Cheib oder eifach d Bärebrüedsche
Liebi Bärefamilie mir bringe euch e neui Folg mit erstunleche Fakte über Zweifel Chips, Olis Paranoia daser Zäiä verliert undere lange Diskussion über Härdöpfle. D Nathalie luegt ono verbi und lütet mit üs dr Summer i. Nehmet eui Liegestüuh füre, gönnet nech es chalts Bier u denket dra... Lache isch gsund! Ps z Bäräss Video isch iz Online!!
...mehr -
Bärebrüedsche - Folg 30 - Ökogagler
Inere witere Episode womir im Stil vo Urologe die letzti Wuche vonand nehme, mit voller Inbrunst üsi Poetryslams zum Beste gebe u mir dir eifach vrzeue wie intelligent mir si findsch du dini Unterhaltig. Mir mache ufgrund vo Olis Ferieufenthalt nechst Wuche e Pouse wöi di aber nid ohni Füürwerk und nöis Material la schmore. Hie hesch richtig guete Stoff für dini Ohre!
...mehr -
Bärebrüedsche - Folg 29 - Kussverbot
I dere Episode stelle mir dir i üsem bekannte u selbst erfundene Spiel namens Wahrheit und Lüg diversi skurili Gsetz vor. Mir fiire ouno dr Geburtstag vo Mike nache und nehme Abschied vomne Kolleg wo leider die Welt verla hett. Trotz de schlechte Nachrichte hei mir dir e lustigi und unterhaltsami Episode barat, wo du mit verschiedenste Frage vo üsne Hörer bombardiert wirsch. Ah und Oli fahrt mit sim Velo im Studio ume. Wieso weiss er nid mal selber ;)
...mehr -
Bäerebrüedsche - Folg 28 - Schiss Chnöpf u Gummi Susis
Dr Früehling isch da u mitem Früehling melde mir üszrügg usere churze Pouse. Mir si widr da mitemne regelrechte Füürwerk us dumme Gschichte, Hintergrundwüsse zu üsem nöiste Filmdräi und öppe 1000 Witze am Schluss womir dir eifach id Ohre ballere. Ah ja... Olis höch Ketchup Verschleiss wird ouno begründet. Viu Spass!
...mehr -
Bärebrüedsche - Folg 27 - Flug Special
Werti Bärefamilie mir begrüesse euch ganz herzlich zu üsem Flug Special wo üs vo Sicherheitsawisige i üsere eigete Airline bis zu ungloubleche Vorfälle i dr Gschicht vo dr Aviatik bringt. Ungloublech si nid nume die Storys, sondern ou üses neue Video wo mir dir usfüehrlech drvo düe berichte. Find zuedem use wie ökologisch üsi Familie isch und wie Oli scho in Barcelona isch gsi. Über ei Stund Vergnüege für fasch die ganzi Familie. Viu Spass wünsche mir dir!
...mehr -
Bärebrüedsche - Folg 26 - Alarm im Darm
Die Folg behandle mir es Tabuthema wo Mike dem Podcast hett gä, da er aber nid alleini ufem Podcast isch hett Oli churzerhand das Tabuthema broche. Was ds isch findsch du i dere Episode use wo voller technischer Defekte isch und dir ganz sicher es Lache iz Gsicht zouberet, wie si üs ou hett. Ps. Blib dranne für e Hammer Poetry Slam Rundi!
...mehr -
Bärebrüedsche - Folg 25 - Mercedes Brennts?
Heit dir mitübercho, dass e Fähre irgendwo im Meer liechter lotus brönnt? Zum alli Details über d Brenntleys, Füüraris und Rouchts Royce z ghöre muesch unbedingt di nöii Bärebrüedsche Folg lose. Mir bringe dir packendi Infos zum Mönsch, e witeri brüederlechi Gmeinsamkeit und zuedem es ohrebetäubends Intro.
...mehr -
Bärebrüedsche - Folg 24 - Bürotechnik
Trotzdem das mir i üsere nöiste Folg hei gseit mir nenne se "Nippel im Titel" hei mir üs umentschlosse die füürigi Folg Bürotechnik z toufe. Natürlech passend zu de grandiose Gegeständ vo dr Wuche. Was das alles beinhaltet ghörsch ir nöie Folg. Zuedem lerne mir üs nach 20 Jahr ir gliche Familie no besser kenne und merke, dass mir familiebedingt verschidegrossi Nipple hei. Tönt emu spannend oder?
...mehr -
Bärebrüedesche - Folg 23 - Krypto Hummer
Wie das du dini Kryptowährige chasch igfriere und zumne spätere Ziitpunkt wieder uftoue und esse i Form vomne Hummer, dass erfahrsch du i üsere Episode 23. Wie du merksch kenne mr üs weder mit Kryokonservierig oder Kryptowährige us aber lustig wirds uf jede Fall. Das isch es verspreche. Üsi längsti Episode nach Folg 1 balleret dir e humorgladene Podcast id Ohre. Mir wünsche dir bim Lose ganz viu Spass!
...mehr -
Bärebrüedsche - Folg 22 - D'Post geit ab
Überhüft mit emne Berg Post si mir im Studio itroffe, was das mir alles hei übercho und nöi organisiert hei ghörsch direkt wennd irgendwo ir Umgebig vo dem Text uf Play drücksch. Mir wünsche dir uf jede Fall viu Spass bim lose u wenn drs grad am überlege bisch eb du ds überhoupts wosch, seges mir i de Wort vom Roger Federer: Chum itz!
...mehr -
Bärebrüedsche - Folg 21 - Ho Lee Fuk
Ho Lee Fuk mir hei widr Gas gä und gar nid wöue ufhöre. Villech hei mir dir brandnöii Infos über üse neust Marketingcoup wo eventuell mitemne familieinterne Betrug z due hett. Mach di gfasst uf ne Episode wo Sam Ting Wong isch u dr Held us üsere Chindheit, dr Winnie Pooh es Revival hett.
...mehr -
Bärebrüedsche - Folg 20 - Chaos im Studio
Wosch du e verruckti Episode lose wo üs dr Bullshit wortwörtlech übere Chopf us gwachse isch? De bisch du genau richtig bi üsem 20-fölgige Jubiläum. Drüviertustund lang neme mir di mit ufne Reis dürne explosiovi, dekorierti, partyversüchti und komplett verwirrti Episode. Fiir mit üs u denk dra das mir üse Bonsai immerno im Agebot hei!
...mehr -
Bärebrüedsche - Folg 19 - Wer wott e Bonsai?
Kennsch dr Marcoooo Odermatt? Mir fäne ihn a wie no nie uf dem Podcast u bringe dir di nöii Episode mitemne liechte Tinitus i de Ohre vor lute Soundtests. Wienes alts Paar schaffe mir wieder e chli spontaner u verkacke es genial adenkts Outro. De Seich wosch du eifach nid verpasse! Du chasch sogar e Bonsai gwinne!!!
...mehr -
Bärebrüedsche - Folg 18+ - Nid ganz jugendfrei
Mir begrüesse euch aui ganz herzlech im nöie Jahr und fröie üs druf euch die neusti Folg z bringe. Aber Achtung dasmal isch nid ganz alles jugendfrei. Was das nid isch ghörsch wennd druf klicksch. Oli geit no iz Westside go bade u hett fasch es Herzchriesi aber das hett ke Zemehang mitem jugendfrei si ;) Ah ja. Hopp Marco Odermatt!!
...mehr -
Bärebrüedsche - Folg 17 - Huestesaft
Mir si widr zrügg us dr Chäferhaft u bringe euch e früschi und letzti Episode für das Jahr. Wiederum bringe mir dir persönlechi Problem usem Alltag oder grandiosi Frage usem Internet direkt i dis Ghör und mir garantiere dir, dass du öppis z Lache hesch. Mir schicke euch aune besti Bäregrüess und wünsche euch aune e guete Rutsch iz nöie Jahr. Mir ghöre üs im 2022 mit früsche Vorsätz und neue Storys.
...mehr -
Bärebrüedsche - Folg 16 - Churchills Chäuer
Wiedr mal bewege mir üs übere gross Teich und vrzeue euch dasmal vo üsne Ferie in London. D Stadt wod Queen imne riese Palast sitzt und die andere Queens im Park Musig mache. Was mir süsch no alles beredt hei und was für spontani Gschichte üs widr i Sinn si cho erfahrsch du wenn du di 54 Minute Ohreschmaus losisch und di hindere lehnsch.
...mehr -
Bärebrüedsche - Folg 15 - Mountain Goat
Bisch du schomal vomne Gemschi agriffe worde? No nid. De los dri dasd weisch wasd muesch mache wenn das passiert. Mike hett das drum schomal erlebt. Zudem hout dir Oli sini Clementine und Mandarindli Facts i sim nöie Poetry Slam umd Ohre. Los dri i üsi bis jetzt amüsantisti und längsti Gschicht zu später Ziit.
...mehr -
Bärebrüedsche - Folg 14 - Bärefriday
Schouspieler das si mir mal gsi. Mal ja... Mir vrzeue dir i dr nöie Episode über üsi Filmkarriere in Steffisburg und bringe dir nächer wie mir d Welt hei wölle verbessere wo mir Kids si gsi. Zuedem empföh mir e nöie Sondergast wo ou e ganz persönlechi Story mit sich bringt. Blib dranne füre Poetryslam und la di vo üs i dr Bärefriday Wuche zum lache la bringe.
...mehr -
Bärebrüedsche - Folg 13 - Harry Stotter
Vor WM in Katar bis zum Wiehnachtsmärit oder dr OHA in Thun. Egal wo du bisch d Bärebrüedsche si widr da für di mit nöiem Material. Dismal bissle mir kem Promi az Bei hei aber Gorillas us Uganda u es paar interessanti Gschichte zu Velostürz und ere Wiimäss im Gepäck. Gloub üs das wosch du nid verpasse!
...mehr -
Bärebrüedsche - Folg 12 - Nachtschicht im Studio
Üsi spätisti Folg sit Beginn vo dr Bärebrüedsche Ära chasch du hie lose. Liecht übermüedet und voller Blödsinn hei mir üs ines wilds Schlamassu us kurlige Gschichte, Spätnachttelefonwettkämpf und Fakte gworfe. Chum mit üs uf die Reis u los d Story vo Olis Begegnig mitem Luca Hänni oder söue mr sege vo Luca Hännis Begegnig mit Oli? Entscheid selber!
...mehr -
Bärebrüedsche - Folg 11 - Schlaberofon
Achtung Spoileralarm: I dere Episode rede mir ganzi zwöi Minute übere nöii James Bond Film. Wenn du das nid wosch lose duesch denn eifach hurti fürespuele. Spuel aber nid zwit, süsch verpassisch du üse Stargast dr Simon üse älter Brüedsch. Mir nehme di wider mit ufne musikalischi, füechti und amüsanti 55 minütegi Zemefassig vo dr letzte Wuche undemne witere Usschnitt us üsem lebe. Los dri!
...mehr -
Bärebrüedsche - Folg 10 - Juhuubiläum
Mir si 10ni! Ganzi 10 Folge alt isch üse best und einzig Podcast mittlerwile scho. Die 10ti Folg wird dir vo zwöi ufdräite u energiegladene Bärebrüedsche präsentiert. Due dini Ohre uf, heb di fest und mach di barat lutt z lache wenn mir dir üsi nöii Challenge präsentiere. Zudem wei mir mit dir üses Jubiläum fiire. Wie mir das zeme chöi fiire erfahrsch ir Episode.
...mehr -
Bärebrüedsche - Folg 9 - Si mir scho berüehmt?
Achtung Achtung d Bärebrüedsche si dusse ir Wildnis. Los üs zue wie mir üsi ersti Folg unter freiem Himmu ufnämä. Oli hett es Gschenk organisiert und Mike hett widrmal es Lachflash. Zuedem houe mir üs erneut e Poetry Slam um d Ohre. Das wosch du eifach nid verpasse!
...mehr -
Bärebrüedsche - Folg 8 - Nadle, Türstopper, Versicherigscharte
Live usem Inselspital präsentiere mir die nöii Folg Bärebrüedsche. Mir griffe wieder diversi wahnsinnig wichtigi Themene uf so wie falsch usgsprocheni englischi Wörter wo üs immer wieder begegne oder erneute spannende Tierstorys mit Audioeffekte. Blib dranne bis am Schluss u los üsi nei geboreni Poetryslam/Rapchallenge u fröi di scho uf Folg 9.
...mehr -
Bärebrüedsche - Folg 7 - Bisslet me i See
Är isch widr zrügg. D Bärebrüedsche si widr vereint u barat dini Ohre mit interessante Storys und emne atemberoubende Freestyle Rap Battle wo id Gschicht igeit z füettere. Zudem spiele mir no live Musig für di. Du wirsches nume gloube wennd dri losisch. List die Beschriebig überhoupt öpper? Löhts üs la wüsse uf Instagram @baerebruedsche
...mehr -
Bärebrüedsche - Folg 6 - Apex Legende
Oli isch leider im Spital u hett e Operation müesse über sech la erga. Mir hei öich aber nid ohni wöchentlichi Folg wöue la si drum hei mir üse erst Gast iglade. Dr Emre vrzellt über sini turbulente zwöi Wuche wo sis Lebe ufe -chopf gstellt hei. Was dr Sido, dr Mario Barth u witeri dütschi Promis drmit z due hei erfahrsch i üsere nöie Folg. Los dri.
...mehr -
Bärebrüedsche - Folg 5 - Achselterror
Mir verlöh üse Kontinent und reise Richtig Afrika. Loset zue was mir in Tunesie erlebt hei und wie Oli amne Esel es Kompliment hett gmacht. Zuedem rede mir über Mikes Gleitschirmflug und ganz vieli existenziell wichtigi Themene.
...mehr -
Bärebrüedsche - Folg 4 - Im freie Fall
Chömet mit i luftigi Höchine mit üsere nöie adrenalingladene Folg womer vo Skydives, usegstreckte Zunge und Highspeed Begegnige mit Wolkene rede. D Bärebrüedsche hebe ab u nehme di mit. Blib bis am Schluss dranne fürne magische Flachwitz und ohrebetäubends Glächter.
...mehr -
Bärebrüedsche - Folg 3 - Zerfetzte Has
Vo liebe herzige Nuschis, über verwahrlosti Goldfisch bis zu igsperrte Bärebrüedsche im Lift. Das gits alles i üsere nöie Folg oder nenne mrs Episode...? Isch ja o glich loset dri, hebet Spass und vrzeuet öine Kollege, Familie u Huustier vo dem Podcast.
...mehr -
Bärebrüedsche - Folg 2 - Beschisseni Struktur
Voilà Folg deux isch barat für euch! Mir hei sogar chli französisch gredt und e extrem starki Schoggi probiert, damit dir das nid müesst mache. Eb die fein isch gsi oder nid chasch selber usefinde wennd uf Play drücksch und dranne blibsch. Mir hei o widr es grandioses Finale ufgno also blib bis zum Schluss drbi :)
...mehr -
Bärebrüedsche - Folg 1 - Wer si mir?
Voilà jetzt ischs offiziell... Die ersti Folg vo de Bärebrüedsche isch dusse! Mir hei üs eifach a d Mikrofon gwagt und wild druf los afah vrzelle, was mir bis jetzt alles i üsem Lebe erlebt hei. Viel Spass bim lose. Gebet üs es Feedback u blibet bis zum Endi dranne :)
...mehr
